Siðanefnd LÍ: Kári sýknaður af kröfum Jóhanns

Siðanefnd Læknafélags Íslands kvað upp úrskurð þann 31. desember síðastliðinn í máli Jóhanns Tómassonar læknis á hendur Kára Stefánssonar læknis.

Jóhann hélt því fram að Kári hefði látið falla um sig ummæli í upphafi fundar í húsakynnum LÍ þann 23. febrúar árið 2000 sem væru andstæð ákvæðum 29. greinar siðareglna LÍ um að lækni sé "skylt að auðsýna öðrum læknum drengskap og háttvísi jafnt í viðtali sem umtali, ráðum sem gerðum ...". Krafðist hann þess að Kára yrðu gerð "viðeigandi og hæfileg viðurlög".

Siðanefnd vísaði málinu frá í maí 2001 en Jóhann kærði þá niðurstöðu til Gerðardóms LÍ sem ómerkti hana og vísaði málinu aftur til Siðanefndar til efnislegrar úrlausnar.

Í niðurstöðu Siðanefndar segir að samkvæmt gögnum málsins liggi ekki ljóst fyrir hvernig orð féllu og því ósannað að þau hafi verið með þeim hætti sem tilgreint er í ákæru Jóhanns. Úrskurður Siðnefndar er því á þessa leið:

"Varnaraðili, Kári Stefánsson, skal vera sýkn af kröfum sóknaraðila, Jóhanns Tómassonar, í máli þessu."

Þennan úrskurð kváðu upp Eggert Óskarsson héraðsdómari sem er formaður Siðanefndar og læknarnir Gizur Gottskálksson og Stefán B. Matthíasson.