Umræða og fréttir

Sigurður Árnason varði doktorsritgerð sína í læknavísindum við Karolinska Institutet þann 28. nóvember síðastliðinn. Titill doktorsritgerðarinnar er Andlitslömun og taugaborrelía barna: meðferð og horfur“ (Facial nerve palsy and Lyme neuroborreliosis in children: treatment and outcome).

Andmælandi var Mervi Kanerva, háls- nef- og eyrnalæknir við Háskólasjúkrahúsið í Helsinki. Í doktorsnefnd sátu Ann Hermansson, Johan Sanmartin Berglund og Maria Lundgren. Leiðbeinandi Sigurðar í verkefninu var Barbro Hedin Skogman og meðleiðbeinendur voru Elin Marsk, Åsa Laestadius og Malou Hultcrantz.

Sigurður lauk sérnámi í barnalækningum við Astrid Lindgrens barnaspítalann á Karolinska árið 2017. Sigurður stundaði einnig nám við Háskólann í Oxford árin 2022-2024 og lauk þaðan gráðu í smitsjúkdómalækningum barna (Postgraduate Diploma of Paediatric Infectious Diseases). Sigurður starfaði sem sérfræðingur í smitsjúkdómateymi Astrid Lindgrens barnaspítalans 2017-2022 og gegnir þar áfram hlutastöðu. Frá 2023 hefur Sigurður starfað sem barnalæknir hjá Domus barnalæknum og sem barnalæknir í smitsjúkdómateymi Barnaspítala Hringsins síðan 2024.

Doktorsverkefnið fjallar um andlitslömun barna og taugaborrelíu (Lyme neuroborreliosis) sem eru samtvinnuð fyrirbæri í löndum þar sem skógarmítlar og borrelía eru landlæg. Skógarmítlar geta borið með sér bakteríuna Borrelia burgdorferi sem við mítlabit getur smitast yfir í menn og valdið ýmsum sýkingum. Algengasta sjúkdómsmyndin er húðborrelía með einkennandi flökkuroða (erythema migrans) en sýkingin getur einnig orðið ífarandi og valdið taugaborrelíu. Algengasta einkenni taugaborrelíu hjá börnum er andlitslömun og sömuleiðis er taugaborrelía algengasta greinanlega ástæða andlitslömunar barna. Rannsóknirnar í doktorsritgerðinni fjölluðu um faraldsfræði, horfur og meðferð andlitslömunar barna í Stokkhólmsléni. Samhliða verkefnum doktorsritgerðarinnar hefur Sigurður unnið að FACE-rannsókninni í Svíþjóð (Facial nerve palsy And Cortisone Evaluation study) sem er slembuð, tvíblind, lyfleysustýrð rannsókn á börnum með andlitslömun til að kanna áhrif stera á útkomu lömunarinnar. Meðferð með sterum er gefin fullorðnum með andlitslömun eftir niðurstöður svipaðra rannsókna en sambærilegar rannsóknir hjá börnum skortir. Fyrstu niðurstaðna úr FACE-rannsókninni er að vænta 2027.

Hvað segir nýdoktorinn?

Af hverju vildir þú verða læknir?

Það var nú aldrei ætlunin að verða læknir. Haustið sem ég „átti“ að byrja í Háskólanum datt mér hins vegar í hug að prófa klásus, sem þá var við lýði. Þó ég hafi ekki komist inn í fyrstu tilraun fannst mér eitthvað heillandi við þetta og ég hef ekki séð eftir því síðan.

Hversu erfitt er að verða doktor, á skalanum 1-10?

Rannsóknarvinnan er að mestu leyti mjög skemmtileg og mjög gagnlegt sem læknir að ganga í gegnum allt ferlið frá rannsóknarspurningu að birtingu greinar. Það sem var klárlega erfiðast í doktorsverkefninu voru öll formsatriðin og skriffinnskan, það reyndi oft og tíðum verulega á.

Hvert yrði þitt fyrsta verk sem heilbrigðisráðherra?

Að breyta Reglugerð 856/2023 frá Heilbrigðisráðuneytinu um veitingu sérfræðileyfa og undirsérgreinaleyfa. Í krafti þessarar reglugerðar taka heilbrigðisyfirvöld hér á landi í mörgum tilvikum illa á móti þeim sem snúa heim úr sérnámi í undirsérgreinum sem ekki hafa formlega viðurkenningu í því landi sem starfað var. Þetta gildir til dæmis um býsna margar undirsérgreinar í barnalæknisfræði en sú reynsla og þekking sem aflað er getur þó verið afgerandi fyrir heilbrigðisþjónustuna hér á Íslandi. Verði þessari reglugerð og viðhorfi ekki breytt er verulega hætta á mönnunarskorti í undirsérgreinum og minni teymum hér á landi.

Hvað er skemmtilegast að gera þegar þú ert ekki í vinnunni?

Það er skemmtilegast að brasa eitthvað með fjölskyldunni í frítímanum. Annars skortir mig ekki áhugamál en ég hef áhuga á hlaupum, útiveru, skíðum, stangveiði, hjólreiðum og fleiru í þeim dúr. Þessa dagana á reyndar „Simply piano“ appið og rafmagnspíanóið hug minn allan!