Umræða og fréttir

69. aðalfundur WMA haldinn í Reykjavík

                                         
                                          Mikil sendisveit frá japanska læknafélaginu fylgdi formanni sínum,
                                          Yokokura, yfir hálfan hnöttinn til Íslands.

Alþjóðalæknafélagið fordæmdi glæpavæðingu lækna á 69. aðalfundi sínum sem haldinn var í fyrsta sinn hér á landi. Tilefnið er framkoma yfirvalda við lækna í Níkaragva, sem sinna þeim sem hafa mætt harðræði í mótmælaaðgerðum gegn stjórnvöldum. Læknar hafa misst vinnu sína eða verið vændir um glæpi fyrir að hjálpa mótmælendum.

                                            
                                             Yokokura var formaður WMA síðasta ár. Hann lét af störfum á fundinum
                                             og flutti ársskýrslu sína.

 „Alþjóðalæknafélagið, WMA, leggur áherslu á að hlutverk lækna er að taka virkan þátt í að styðja og stuðla að réttindum allra til læknishjálpar sem byggist eingöngu á klínískum þörfum. Þeirra er að mótmæla löggjöf og venjum sem eru í bága við þennan grundvallarrétt,“ segir í tilkynningu félagsins eftir fundinn, sem gekk vel á allan hátt og umgjörðin til fyrirmyndar.

„Við fordæmum algjörlega þetta niðurrif almenna heilbrigðiskerfisins í Níkaragva og sundrunar siðareglna og mannréttinda í landinu,“ er haft eftir Leonid Eidelman, nýjum forseta félagsins.

                                             
                                              Sólveig Jóhannsdóttir framkvæmdastjóri Læknafélags Íslands og Jón
                                              Snædal forseti siðfræðiþings LÍ og WMA voru ánægð með þingið, staðinn
                                              og veðrið sem sýndi sitt haustúrval með roki og rigningu en líka 5000
                                              stjörnu norðurljósasýningu!

                                              
                                               Guðni Th. Jóhannesson forseti Íslands ávarpaði samkomu WMA og
                                               spurði: How do you like Iceland?

                                                
                                                 Það var áhrifamikið þegar Guðrún Ása Björnsdóttir formaður Félags
                                                 almennra lækna las Genfar-heiti WMA á íslensku og fundargestir risu úr
                                                 sætum og fóru með heitin á ensku, spænsku eða frönsku.

                                                
                                                 Reynir Arngrímsson formaður afmælisbarnsins, Læknafélags Íslands, og
                                                 Otmar Kloiber, framkvæmdastjóri afmælisgestanna,
                                                 Alþjóðalæknafélagsins, WMA.

                                                     
                                                      Læknafélög í 58 löndum áttu fulltrúa á fundinum, og
                                                      meira að segja Vatíkanið sendi sinn mann á vettvang.

Jafnrétti og innflytjendamál voru til umfjöllunar þeirra 194 fundarmanna frá 58 löndum sem sátu fundinn dagana 3.-6. október. Þessi málefni urðu að Reykjavíkur-yfirlýsingunum. Margir fundargesta munu þó eflaust helst minnast hans fyrir útgöngu kanadíska læknafélagsins úr alþjóðafélaginu eftir að hafa sakaði nýja forsetann um að eigna sér hluta af ræðu forvera í innsetningarræðu sinni síðasta daginn. Dr. Frank Montgomery, varaforseti félagsins, sagðist sjá á eftir þeim úr félaginu og vonast til að sjá þá aftur í fyllingu tímans.

                                             
                                             Reynir ávarpar fund Alþjóðalæknafélagsins, og í pallborði eru fráfarandi
                                             og verðandi forseti.

                                             
                                                    Nýr formaður sver embættiseiðinn, Ísraelinn Leonid Eidelman.

                                              
                                               Starfsmenn LÍ héldu þinginu gangandi og leystu hvers manns vanda:
                                               Margrét Aðalsteinsdóttir, Dögg Pálsdóttir og Sólveig Jóhannsdóttir.

                                                             

„Dr Eidelman bað bæði ráðið og þingið afsökunar sem samþykktu beiðnina,“ sagði varaforsetinn.

Reykjavíkur-yfirlýsingin um jafnrétti innan læknastéttarinnar var sett fram vegna fjölgunar kvenna í stéttinni, og bent á að víða væru konur yfir 50% læknanema. Þar segir að starfsumhverfið og námið verði að breytast til að styðja alla einstaklinga sem vilji vera læknar og veitt ráð svo það megi gerast. Konur verði að hafa jöfn tækifæri á við karla innan geirans.

Í Reykjavíkur-yfirlýsingunni um innflytjendur er lýst yfir áhyggjum af að lönd sem taki á móti flóttafólki séu að þrengja löggjöf sína. Staða og hlutverk lækna er áréttuð, rétt eins og í ákallinu til yfirvalda Níkaragva.

„Alltaf þarf að forgangsraða heilsu manna umfram aðra hagsmuni,“ leggur forsetinn þar áherslu á.