Læknablaðið brýtur blað – birting greina á ensku

Eins og lesendur blaðsins þekkja eflaust, hefur Læknablaðið verið skráð í alþjóðlegum vísindagagnagrunnum allt frá árinu 2005 (Medline), Science Citation Index (frá 2009) og Scopus (frá 2009). Greinar úr Læknablaðinu má finna frá 1966 fram til 1974. Árið 2005 vann ritstjórn Vilhjálms Rafnssonar það þrekvirki að koma blaðinu aftur á Medline. Því hafa höfundar sent með greinum sínum á íslensku, ágrip á ensku og töflur og myndir á ensku.

Nú gefur Læknablaðið höfundum tækifæri á að birta greinar sínar á Íslensku sem og ensku, verður tengill á ensku útgáfuna á PubMed (leitarvél Medline). Það er val höfunda að senda grein sína með enskri útgáfu. Ef svo er gert, er greinin fyrst ritrýnd á hefðbundinn hátt á íslensku, ef og þegar hún er samþykkt ber höfundum að þýða grein sína yfir á ensku. Þýðinguna má ekki gera með notkun gervigreindarforrita og skal að hámarki taka viku. Að því loknu sendir Læknablaðið greinina til yfirlestrar af löggiltum skjalaþýðanda sem að loknum yfirlestri sendir greinina til höfunda og til Læknablaðsins. Þær breytingar sem höfundar þurfa mögulega að gera eftir yfirlestur skjalaþýðanda, þurfa að berast innan viku til Læknablaðsins. Ritstjórn yfirfer lokaútgáfu greinarinnar á ensku með hliðsjón af ábendingum frá skjalaþýðanda. Kostnað yfirlestrar skjalaþýðanda greiða höfundar sjálfir. Reikningur skjalaþýðanda berst höfundum að yfirlestri loknum. 

Með birtingu greinarinnar; Komur á bráðamóttöku Landspítala vegna rafskútuslysa sumrin 2023-2025, í þessu blaði, er brotið blað í sögu Læknablaðsins, sem óskar höfundum til hamingju og þakkar gott samstarf við vinnslu greinarinnar.