listamaður mánaðarins

Birgir Andrésson (f. 1955) er myndlistarmaður sem segja má að sé mjög íslenskur en um leið fæst hann við málefni sem ofarlega eru á baugi í alþjóðlegu samhengi. Hann hefur leitað fanga í sögum, hefðum og handverki þjóðarinnar og dregið fram í verkum sínum sem unnin eru í ólíka listmiðla. Þau eiga það sameiginlegt að vera aðlaðandi, litrík og oft á tíðum gamansöm en geta um leið vakið áhorfendur til umhugsunar um knýjandi málefni okkar tíma. Fáir hérlendir listamenn hafa tekist á við sjálfsmynd þjóðar og rýni í menningarsögu með þeim hætti að af því megi bæði hafa gagn og gaman. Í sinni nýjustu myndaseríu, Nýbúar, frá þessu ári, sækir hann ekki langt aftur í tímann en Ora niðursuðudósirnar skipa óneitanlega sérstakan sess hjá þjóðinni sem vinsæl neysluvara. Á hverri ljósmynd hefur Birgir plantað framandi plöntu í dós undan mismunandi framleiðsluvöru niðursuðufyrirtækisins og tilgreinir með texta á myndinni hvað um sé að ræða. Allar eru plönturnar í dósunum gróskumiklar og gefa von um að með frekari umönnun og umpottun í varanlegan jarðveg komi þær til með að dafna vel. Hér er ekki flókið myndmál á ferðinni og boðskapurinn ljós, ef til vill pólitískari en áður hefur sést frá listamanninum. Önnur ný verk Birgis eru af svipuðum toga en það eru textamálverk þar sem titlar þekktra, erlendra, svart/hvítra kvikmynda eru málaðir með ?íslenskum litum?. Hann hefur lagt sig eftir að finna séríslenska liti sem hann leitar uppi í íslenskri byggingarlist og á minjasöfnum og flokkar eftir alþjóðlegum litakerfum. Hvort tveggja, ljósmyndirnar og málverkin, eru góð dæmi um hugmyndafræði listamannsins og húmor sem sjaldan er langt undan. Hann hefur verið fulltrúi Íslands á Feneyjatvíæringnum þar sem hann sýndi m.a. handprjónaða fána í sauðalitunum. Ný verk prýða nú hina endurnýjuðu ferju Norrænu þar sem hann vann með gömul, íslensk frímerki. Ef til vill er hann þekktastur fyrir textaverk sem eru portrett eða lýsingar, þar sem fjallað er um fólk, hross, byggingar og sjórekin lík svo dæmi séu tekin. Þá er hann mikill teiknari auk þess sem hann vinnur með ljósmyndir, skúlptúra, myndbönd og hljóð. Fram í janúar stendur yfir kynning á verkum Birgis í Safni á Laugavegi. Gleðileg jól!