Rannsóknarráðstefna sérnámslækna í lyflækningum 2026

Árlega er haldin Rannsóknarráðstefna sérnámslækna í lyflækningum. Þar kynna sérnámslæknar rannsóknarverkefni sín sem þeir stunda samhliða sérnáminu. Verkefnin eru mismunandi langt komin, sum rétt að hefjast og önnur komin lengra. Þann 20. mars var ráðstefnan haldin í ár. Auk sérnámslæknanna mæta einnig virtir vísindamenn innan sem utan Landspítala og verða umræðurnar því afar gefandi og allir ungu vísindamennirnir hafa með sér umhugsunarefni inn í sínar rannsóknir í lok dags. Fyrir ári var veitt í fyrsta sinn viðurkenning fyrir besta erindið og var því áframhaldið í ár. Nefnd skipuð völdum virtum vísindamönnum sameinast um að velja besta erindið. Allir fá mat frá þeirri nefnd inn í sitt „Port-folio“.  

Ráðstefnan hefur fests í sessi og hefur haldið sama skipulagi í áraraðir. Að lokinni setningu ráðstefnunnar frá umsjónarlækni hennar, undirritaðri, flytur prófessorinn í lyflækningum, Einar S. Björnsson, hvatningarerindi. Einnig hefur skapast hefð fyrir því að nýdoktor í lyflækningum flytji erindi um sína upplifun af doktorsnámi samhliða sérnámi og flutti nýdoktor Ólafur Pálsson gigtarlæknir það erindi í ár. Hann lauk sínu doktorsnámi með þeim einstæða atburði að verja doktorsritgerð sína bæði við Háskóla Íslands og Háskólann í Lundi í Svíþjóð. Ólafur er því með tvöfalt doktorspróf og hafði eins og við mátti búast sérstaka upplifun af því. Eins og undanfarin ár lauk ráðstefnunni með heiðurserindi til sérnámslæknanna frá virtum vísindamanni. Prófessor Björn Guðbjörnsson, heiðursvísindamaður Landspítala 2025, hélt heiðurserindið á sinn einstaka hátt, hvatningu til vísindavinnu til sérnáms-læknanna. Svo skemmtilega vildi til að hann hafði einnig verið leiðbeinandi Ólafs Pálssonar í hans doktorsnámi.  

Þetta var afar skemmtilegur dagur, uppskeruhátíð vísindavinnu sérnámslæknanna sem endar með gleðskap þeim til heiðurs. Ætlast er til að allir sérnámslæknar í lyflækningum mæti og leiðbeinendur þeirra, auk annarra áhugasamra sérfræðinga í lyflækningum. Í ár var ráðstefnan haldin að Nauthóli eins og mörg fyrri ár. Án stuðnings Vistor væri þetta ekki mögulegt og eru þeim færðar þakkir.  

Besta erindið er metið með tilliti til innsends ágrips, kynningar þess og svörunar spurninga með tilliti til þekkingar á rannsóknarverkefninu. Viðurkenningu fyrir besta erindið árið 2026 hlaut Hörður Tryggvi Bragason sérnámslæknir. Öll erindi ráðstefnunnar hafa verið birt í fylgiriti við Læknablaðið.