Með nokkurri reisn

Gamall karlmaður kom til læknis og bað hann að skrifa út lyfseðil fyrir viagra.

"Alveg sjálfsagt," sagði læknirinn, "hvað viltu margar töflur?"

"Bara nokkrar," sagði maðurinn, "kannski svona eins og fjórar, en skrifaðu gjarnan á lyfseðil­inn að ég eigi að nota fjórða hluta úr töflu hverju sinni."

"Ég er ansi hræddur um að einn fjórði úr töflu hafi lítið að segja fyrir þig," sagði læknirinn.

"Það er allt í lagi með það," sagði sá gamli. "Ég er níutíu ára og þarf ekkert á þeim að halda til að bæta mér kynlífið því það er búið. Mér finnst hins vegar alveg ömurlegt að pissa alltaf á skóna mína."

Oföndun

Beðið var um neyðarbíl með lækni. Tilkynnt var um unga konu sem væri með hjartaverk. Við komu á staðinn tók ungur maður á móti sjúkra­liðs­mönnunum og sagði vinkonu sína "eiga í erf­ið­leikum með öndun, vera föla og kaldsveitta". Inni í svefnherbergi lá fáklædd kona í rúminu. Með læknisskoðun á staðnum var gengið úr skugga um að hún væri ekki alvarlega veik. Konan virtist róast þegar hún frétti það og sagði: "Þetta er í fyrsta skipti sem ég sef hjá og vinir mínir höfðu ráðlagt mér að anda djúpt og stynja nóg eins og þær gera í bíómyndunum."

Í skoðun hjá læknanema

Læknanemi á 5. ári var að framkvæma mjög langa og ítarlega skoðun á gamalli konu. Eftir að læknaneminn hafði beðið gömlu konuna að nefna helstu ráðamenn þjóðarinnar sagði hann: "Nú vil ég biðja þig um að reikna fyrir mig nokkur dæmi."

"Heyrðu mig, ljúfurinn. Þú ert í háskólanum og allir vinir þínir eflaust líka. Viltu ekki biðja einhvern þeirra að hjálpa þér með stærðfræðina?"

Næstum alla leið

Það er barið á dyrnar hjá Sankti Pétri. Hann opnar og sér mann standa fyrir utan. Sankti Pétur er í þann veginn að fara að ræða frekar við manninn þegar sá síðarnefndi hverfur skyndilega. Nokkrum andartökum síðar er aftur barið að dyrum. Sankti Pétur opnar, sér manninn og er alveg við það að sleppa fyrsta orðinu þegar maðurinn hverfur aftur.

"Heyrðu, lagsi, ertu að gera at í mér?" kallar Sankti Pétur á eftir manninum og er létt pirraður.

"Nei," heyrist sagt kvíðablandinni röddu úr fjarska. "Þeir eru að reyna að endurlífga mig."

Alveg til í það

Sjötíu og fimm ára kona kom til heimilislæknisins í eftirlit. Læknirinn sagði að hún þyrfti að hreyfa sig meira og ráðlagði henni að stunda kynlíf þrisvar í viku.

"Viltu vera svo góður að segja manninum mín­um frá þessu," sagði konan.

Læknirinn kallaði á manninn sem beið í biðstofunni og sagði honum að frúin þyrfti að stunda kynlíf þrisvar í viku.

Makinn sem var áttræður spurði: "Á hvaða dög­um?"

"Hvað segið þið um mánudaga, miðvikudaga og föstudaga?"

"Ég get komið með hana á mánudögum og miðvikudögum," sagði maðurinn, "en á föstudögum verður konan að taka strætó."

Afrek lýtalækna

Hjón lentu í hræðilegu bílslysi. Konan brenndist alvarlega í andliti. Lýtalæknirinn sagði að ekki væri hægt að græða húð af líkama hennar í andlitið af því að húð hennar væri svo þunn. Eiginmaðurinn bauðst þá til að gefa konunni húð af líkama sínum ef læknirinn teldi það geta gengið. Svo ótrúlega vildi til að vefjaflokkar hjónanna pössuðu saman. Læknirinn taldi húðina af afturenda mannsins vera þá einu sem hentaði og kæmi til greina að flytja í andlit konunnar. Hjónin bundust fastmælum um að segja engum frá því hvaðan húðin í andliti konunnar væri komin og báðu lækninn þess lengstra orða að segja ekkert um það heldur.

Aðgerðin gekk eins og best varð á kosið. Konan var alsæl með árangurinn og var djúpt snortin yfir fórnfýsi maka síns.

"Elskan mín," sagði konan, "ég fæ aldrei fullþakkað þér fyrir það sem þú hefur gert fyrir mig. Ég veit ekki hvort ég get nokkurn tíma endurgoldið þér þennan greiða."

"Ástin mín," sagði maðurinn, "hafðu engar áhyggjur af því. Ég fæ umbun mína í hvert skipti sem ég sé mömmu þína kyssa þig á kinnina."